Enquête sur les marches de Bretagne et Poitou, vers 1465
Expert
-
-
Mémoires et articles des exceix et prinses trizonnieres faiz es marches
d’entre Bretaigne et Poitou par Raoullet Co[ur]ssier se disant co[m]missaire du
roy et aultres ses satellites et adherenz dont on ne sçait les noms.
Item, ont esté Jehan Jovenniere, Collas Jovenniere, Ugues Pontaiseau
et aultres se disans commissaires du roy en la parroesse du Boais de
Sené, et ont executé ou tenement des Boquayz qui est
prouchement tenu du sire de Rays en sa jurisdiction de Machecou,
lequel le tient nuement de Bretaigne, et ne sont obboissans
fors a la jurisdiction du duc et a celle du sire de Rays, ne
contributiffs a tailles fors a celles qui sont imposees de par
le duc, non obstant que ladicte parroesse de Sené soit marche commune.
Item, est vroy que puis cinq ou six ans les parroessiens de
Paux, de La Trinité de Machecou, La Garnache en ce que touche la marche,
le Bois de Cené ont fait tailles par entr’elx pour la conduicte de leurs
causes et autrement, et en ont impetré lettres du
roy de congié et licence de ce faire, sans aucunement obtenir ne
impetrer de lettre ne mandement du duc, ce que ne pevent faire
sellond l’usement des marches quar
ilz ne doivent savoer de lettre du roy que paroillement ilz n’en
aint du duc ; et de tout ce, appiert par enqueste.
-